„წარმატებისთვის აუცილებელია რწმენა, მონდომება, შემართება და ენერგია“- ზემო თხილნარის საჯარო სკოლის დირექტორი
31-03-2021
დაკოპირებულია
-
+
რა არის სკოლა, რა სჭირდება მომავალ თაობას, როგორ იხსენებენ საკუთარ თავს მოსწავლის ამპლუაში და რაში ეხმარებათ დირექტორობა? - ამ და სხვა საინტერესო კითხვაზე etaloni.ge-ს ზემო თხილნარის საჯარო სკოლის დირექტორი თამაზ ფუტკარაძე ბლიც-ინტერვიუში პასუხობს.
- სკოლა არის...
- სპეციფიკური სასწავლო დაწესებულება, რომელიც მოზარდებს აძლევს ზოგად განათლებას და გზას უკაფავს ცხოვრებაში საკუთარი ადგილის პოვნასა და დამკვიდრებაში.
- ცოდნა გვანიჭებს...
- უნარს, ჩვევებს, ობიექტურად განვჭვრიტოთ ჩვენი მომავალი, მოვიწყოთ პირადი და საზოგადოებრივი ცხოვრება, დავძლიოთ პრობლემები და ნაკლებად დავუშვათ შეცდომები.
- მომავალ თაობას სჭირდება...
- ცოდნა, განათლება, იმაზე უფრო გაცილებით მეტი, რასაც დღეს ვაძლევთ, რათა ღრმად ჩაწვდნენ უახლოესი მომავლის პრობლემათა არსს და არ გაუჭირდეთ მათი დაძლევა.
- როდესაც მოსწავლე ვიყავი...
- ვფიქრობდი, რა გზა ამერჩია ცხოვრებაში, რით მემსახურა ხალხზე, მაშინ ავირჩიე პედაგოგობა და არც ვნანობ, ვხალისდები როცა შრომას შედეგი მოაქვს.
- დირექტორობა მეხმარება...
- ჩემი შესაძლებლობებისა და რესურსების გამოვლენაში, რომლებიც მიმართულია მოზარდების გვერდში დგომისა, დახმარებისა და სამომავლო გზების განსაზღვრაში.
- საკუთარ თავს ხშირად ვახსენებ...
- რომ ვიყო ყოველთვის ობიექტური, საქმიანობა შედეგზე გამსვლელი, მაქსიმალურად გამოვიყენო დრო, არ გამიჩნდეს სინანულის გრძნობა.
- წარმატებისთვის აუცილებელია...
- რწმენა გამარჯვების, მონდომება, შემართება, ენერგია და რა თქმა უნდა, მიზანმიმართული მოქმედება და შრომა.