„ო, ენავ ჩემო, დედაო ენავ!“ - ამ სახელწოდებით გამართეს დედაენის დღისადმი მიძღვნილი ღონისძიება ქობულეთის მუნიციპალიტეტის სოფელ საჩინოს საჯარო სკოლაში.

სკოლაში ღონისძიება ღია ცის ქვეშ, რეგულაციების ზედმიწევნით დაცვით გაიმართა. მოსწავლეებმა წარმოადგინეს ლექსები, მუსიკალური ნომრები და წაიკითხეს საინტერესო ამონარიდები დედაენის შესახებ.

სკოლაში ჩატარებულ ღონისძიებას მზევინარ ბერიძე ხელმძღვანელობდა.

ეს დღე მოსწავლეებისთვის დასამახსოვრებელი გამოდგა, მათმა სასცენო შესრულებამ კი, დამსწრე საზოგადოების მოწონება დაიმსახურა.

შეგახსენებთ, რომ 14 აპრილს, საქართველოში დედაენის დღე აღინიშნება. ეს დღე 1990 წელს, 1978 წლის 14 აპრილის მოვლენების აღსანიშნავად, დაწესდა. 

1978 წლის 14 აპრილს კონსტიტუციაში სახელმწიფო ენის შესახებ ჩანაწერის ცვლილების წინააღმდეგ თბილისში სტუდენტური მანიფესტაციები დაიწყო. ცვლილების თანახმად, საქართველოს რესპუბლიკაში ქართული ენის, როგორც სახელმწიფო ენის სტატუსი უქმდებოდა. მანიფესტაციების შედეგად, ქართულ ენას სახელმწიფო ენის სტატუსი შეუნარჩუნდა.

საბჭოთა კავშირის ხელისუფლებამ გააცნობიერა‚ რომ მხოლოდ ორი გამოსავალი იყო - სისხლისღვრა ან დათმობა და მოსკოვი იძულებული შეიქმნა დაეთმო. ამ მოვლენების გამო 14 აპრილი არაოფიციალურად დედაენის დღედ გამოცხადდა.

იხილეთ ფოტოები: