ნინოწმინდის მუნიციპალიტეტის სოფელ დიდი არაქალის საჯარო სკოლის მე-8 და მე-9 კლასის მოსწავლეებმა  ქართულის, როგორც მეორე ენის მასწავლებლების - ვარსენიკ ხაჩატრიანისა და ვარტანუშ სანოსიანის ხელმძღვანელობით,  დედაენის დღესთან დაკავშირებით, საინტერესო ღონისძიება ჩაატარეს.

სხვადასხვა აქტივობის განხორციელების შემდეგ მოსწავლეებმა მონაწილეობა მიიღეს კონკურსში სახელწოდებით -  „საუკეთესო კალიგრაფია“. გამოვლინდნენ გამორჩეული ნამუშევრების ავტორები. 

14 აპრილს, საქართველოში დედაენის დღე აღინიშნება. ეს დღე 1990 წელს, 1978 წლის 14 აპრილის მოვლენების აღსანიშნავად, დაწესდა. 

1978 წლის 14 აპრილს კონსტიტუციაში სახელმწიფო ენის შესახებ ჩანაწერის ცვლილების წინააღმდეგ თბილისში სტუდენტური მანიფესტაციები დაიწყო. ცვლილების თანახმად, საქართველოს რესპუბლიკაში ქართული ენის, როგორც სახელმწიფო ენის სტატუსი უქმდებოდა. მანიფესტაციების შედეგად, ქართულ ენას სახელმწიფო ენის სტატუსი შეუნარჩუნდა.

საბჭოთა კავშირის ხელისუფლებამ გააცნობიერა‚ რომ მხოლოდ ორი გამოსავალი იყო - სისხლისღვრა ან დათმობა და მოსკოვი იძულებული შეიქმნა დაეთმო. ამ მოვლენების გამო 14 აპრილი არაოფიციალურად დედაენის დღედ გამოცხადდა.

იხილეთ ფოტოები