თერჯოლის მუნიციპალიტეტის სოფელ ახალთერჯოლის საჯარო სკოლის VII კლასის მოსწავლეებმა, დისტანციის სრული დაცვით, ლიტერატურულ-შემეცნებითი კომპოზიცია -„ენა დედაა ერისა“ გამართეს. 

VII კლასის ხელმძღვანელი სონია გოგალაძეა, მოსწავლეებს ქართულ ენასა და ლიტერატურას მელანო გაბეხაძე ასწავლის. სკოლის დირექტორი ნინო თოდიძე გახლავთ. 

„ღონისძიების ხელმძღვანელმა მოსწავლეებს გააცნო ქართული ენის ისტორია. მოსწავლეებმა მხატვრულად
წაიკითხეს ქართულ ენაზე შექმნილი ლექსები, ბრძნული გამონათქვამები, გააცოცხლეს სიტყვები“,- აღნიშნულია სკოლის ინფორმაციაში. 

14 აპრილს, საქართველოში დედაენის დღე აღინიშნება. ეს დღე 1990 წელს, 1978 წლის 14 აპრილის მოვლენების აღსანიშნავად, დაწესდა. 

1978 წლის 14 აპრილს კონსტიტუციაში სახელმწიფო ენის შესახებ ჩანაწერის ცვლილების წინააღმდეგ თბილისში სტუდენტური მანიფესტაციები დაიწყო. ცვლილების თანახმად, საქართველოს რესპუბლიკაში ქართული ენის, როგორც სახელმწიფო ენის სტატუსი უქმდებოდა. მანიფესტაციების შედეგად, ქართულ ენას სახელმწიფო ენის სტატუსი შეუნარჩუნდა.

საბჭოთა კავშირის ხელისუფლებამ გააცნობიერა‚ რომ მხოლოდ ორი გამოსავალი იყო - სისხლისღვრა ან დათმობა და მოსკოვი იძულებული შეიქმნა დაეთმო. ამ მოვლენების გამო 14 აპრილი არაოფიციალურად დედაენის დღედ გამოცხადდა. 

იხილეთ ფოტოები