ახალციხის მუნიციპალიტეტის სოფელ ღრელის საჯარო სკოლაში დედაენის დღესთან დაკავშირებით კლასის ხელმძღვანელებმა მოსწავლეებთან შეხვედრები გამართეს, რომლის ცენტრალურ თემასაც ქართული ენის სიწმინდე წარმოადგენდა. 

პედაგოგებმა მოსწავლეებს შეახსენეს, რომ 14 აპრილს საქართველოში დედაენის დღე აღინიშნება. მათ სკოლის აღსაზრდელებს გააცნეს ქართული ენის ისტორიასთან და უნიკალურობასთან დაკავშირებული მნიშვნელოვნი საკითხები. 

დედაენის დღე 1990 წელს, 1978 წლის 14 აპრილის მოვლენების აღსანიშნავად დაწესდა. 

1978 წლის 14 აპრილს კონსტიტუციაში სახელმწიფო ენის შესახებ ჩანაწერის ცვლილების წინააღმდეგ თბილისში სტუდენტური მანიფესტაციები დაიწყო. ცვლილების თანახმად, საქართველოს რესპუბლიკაში ქართული ენის, როგორც სახელმწიფო ენის სტატუსი უქმდებოდა. მანიფესტაციების შედეგად, ქართულ ენას სახელმწიფო ენის სტატუსი შეუნარჩუნდა.

საბჭოთა კავშირის ხელისუფლებამ გააცნობიერა‚ რომ მხოლოდ ორი გამოსავალი იყო - სისხლისღვრა ან დათმობა და მოსკოვი იძულებული შეიქმნა დაეთმო. ამ მოვლენების გამო 14 აპრილი არაოფიციალურად დედაენის დღედ გამოცხადდა.