დედამიწის დღეს წმ. ანდრია პირველწოდებულის სახელობის გიმნაზიაში გარემოზე განსაკუთრებულად იზრუნეს
22-04-2021
დაკოპირებულია
-
+
მისი ყოვლადუსამღვდელოესობის მარგვეთისა და უბისის ეპისკოპოსის და წმიდა ანდრია პირველ წოდებულის სახელობის გიმნაზიის რექტორის - მეუფე მელქისედეკის (ხაჩიძე) ლოცვა-კურთხევით, წმ. ანდრია პირველწოდებულის სახელობის გიმნაზიაში, რომლის დირექტორიც, დეკანოზი მამა პავლე გახლავთ, გაიმართა საინტერესო აქტივობები დედამიწის დღესთან დაკავშირებით.
„დედამიწა ჩვენი სახლია, ჩვენ ვზრუნავთ მასზე მცხოვრები გარეული ფრინველების ყოველდღიურობაზე“ - ამ თემაზე გიმნაზიის მე-2 კლასის მოსწავლეებმა, რომელთა დამრიგებელი მაია მაღრაძეა, იზრუნეს ფრინველებზე და გაუკეთეს „სახლი“, რომელიც დაკიდეს ხეზე.
„გარდა იმისა, რომ დავეხმარეთ ფრინველებს, ვისაუბრეთ უმთავრესზე - როგორ მოვუაროთ დედამიწას. მხოლოდ გარემოსადმი პასუხისმგებლობის გამოჩენა გვაძლევს იმის საშუალებას, რომ პოზიტიურად შევცვალოთ ჩვენი პლანეტის მომავალი“ - აღნიშნა მასწავლებელმა.
ასევე, ხარაგაულის წმიდა ანდრია პირველწოდებულის სახელობის გიმნაზიის IV კლასის მოსწავლეებიც, პედაგოგ ანა ჭანკვეტაძესთან ერთად, ჩაერთნენ დედამიწის მსოფლიო დღის კვირეულის ფარგლებში და მოაწყვეს გამწვანების აქცია - შენც დარგე ერთი ხე! - და გიმნაზიის მიმდებარე ტერიტორიაზე დარგეს ნერგები.
დედამიწის დღისადმი მიძღვნილ კვირეულს შეუერთდნენ მესამეკლასელებიც და უსაყვარლეს მასწავლებელთან - მედეა უჩაძესთან ერთად, იზრუნეს გარემოზე და ამ აქტივობებით, საზოგადოებას კიდევ ერთხელ მოუწოდეს - გავუფრთხილდეთ გარემოს და არასოდეს დაგვავიწყდეს, რომ დედამიწა ჩვენი სახლია.
ჩვენ კი შეგახსენებთ, დედამიწის საერთაშორისო დღე მსოფლიოში ერთ-ერთი ყველაზე მასშტაბური გარემოსდაცვითი ღონისძიებაა, რომლშიც ყოველ წელს მსოფლიოს 192 ქვეყნის სხვადასხვა ორგანიზაცია და მილიონობით მოხალისე მონაწილეობს.
1970 წელს სანტა ბარბარას საბადოდან ნავთობის დაღვრას შედეგად ოკეანის დაბინძურება და წყლის ბინადართა განადგურება მოჰყვა. ამერიკელი გარემოსდამცველი სენატორის, გეილორდ ნელსონის მოწოდებას, დაეცვათ დედამიწა, 20 მილიონი ადამიანი შეურთდა. მას შემდეგ, დედამიწის დღე ყოველწლიურად 22 აპრილს აღინიშნება.
საქართველო „დედამიწის დღეს“ 1990 წლიდან სხვადასხვა გარემოსდაცვით ღონისძიებით აღნიშნავს.