„დირექტორობა ადამიანების უკეთ გაცნობაში მეხმარება“ - პეტროს ტონოიანი, ალათუმანის საჯარო სკოლის დირექტორი
10-05-2021
დაკოპირებულია
-
+
რას გვანიჭებს ცოდნა, რა არის წარმატებისთვის აუცილებელი, რაში ეხმარება დირექტორობა, რას ახსენებს ხშირად საკუთარ თავს - ამ და სხვა საკითხებზე etaloni.ge ახალქალაქის მუნიციპალიტეტის სოფელ ალათუმანის საჯარო სკოლის დირექტორის, პეტროს ტონოიანის ბლიც-ინტერვიუს გთავაზობთ:
- სკოლა არის...
- ის ადგილი,სადაც უამრავი ბავშვის ცნობისმოყვარე თვალები ინტერესით და რაღაც სიახლის მოლოდინით სასოებით შემოგყურებს და შენ უფლება არ გაქვს მას ეს იმედები გაუცრუო,დიდი სითბო და სიყვარული უნდა გამოიჩინო, რომ კარგ ადამიანებად ჩამოყალიბდნენ,კარგისა და ცუდის გარჩევა შეძლონ,შეიძინონ აუცილებელი უნარები,რომ ამ ცხოვრების რთულ ლაბირინთებში დამოუკიდებლად შეძლონ გზის გაკვლევა,სამშობლოსა და ადამიანების სიყვარული უნდა ჩაუნერგო.
- ცოდნა გვანიჭებს...
- ცოდნა გვანიჭებს უდიდეს ძალას, რათა შევიცნოთ სამყარო, გავერკვეთ, ვინ ვართ, საიდან მოვდივართ და სად მივდივართ...ერთი სიტყვით-ცოდნა სინათლეა!
- მომავალ თაობას სჭირდება...
- მომავალ თაობას სჭირდება განათლება, შრომისმოყვარეობა, სიკეთე და სიყვარული.
- როდესაც მოსწავლე ვიყავი...
- როდესაც მოსწავლე ვიყავი, ვოცნებობდი, მალე დამთავრებულიყო მოსწავლეობის პერიოდი. ახლა მენატრება ის დრო, უდარდელი ბავშვობა...
- დირექტორობა მეხმარება...
- დირექტორობა მეხმარება უფრო უკეთ გავიცნო ადამიანები ბავშვებიდან დაწყებული პენსიონერებით დამთავრებული. ვასწავლო და ვისწავლო მათგან, უკეთესად შევიცნო საკუთარი პიროვნება.
- საკუთარ თავს ხშირად ვახსენებ...
- რომ ყველაფერი წარმავალია სიკეთის გარდა. ამიტომ ვცდილობ სიკეთე ვთესო,როგორც შემიძლია.
- წარმატებისთვის აუცილებელია...
- წარმატებისთვის აუცილებელია შრომა, შრომა და კიდევ მუხლჩაუხრელი შრომა.