„სკოლებში ფსიქოემოციურ მხარდაჭერას უდიდესი მნიშვნელობა აქვს“ - ია მეფარიშვილი, ტობანიერის საჯარო სკოლის დირექტორი
19-05-2021
დაკოპირებულია
-
+
თანამედროვე მიდგომები და არსებული რეალობა სკოლებს სხვადასხვა მოთხოვნებს უყენებს. შესაბამისად, თითოეული საგანმანათლებლო დაწესებულება ვალდებულია, ფეხი აუწყოს მათ. სასკოლო ცხოვრებაში სოციალური მუშაკის ინტეგრირება ერთ-ერთი მნიშვნელოვანი სიახლეა, რომლის შესახებაც სკოლის დირექტორების შეხედულება ძალიან საინტერესოა. ამჯერად, ამ საკითხზე etaloni.ge ვანის მუნიციპალიტეტის სოფელ ტობანიერის საჯარო სკოლის დირექტორის, ია მეფარიშვილის მოსაზრებას გთავაზობთ:
- თქვენი აზრით რას შეცვლის სასკოლო ცხოვრებაში სოციალური მუშაკების ინტეგრირება?
- სკოლა ბავშვის ცხოვრებისა და განვითარების პროცესში უმნიშვნელოვანეს როლს ასრულებს. თანამედროვე ცხოვრებაში სკოლა არა მხოლოდ განათლების, არამედ ბავშვის პიროვნული და სოციალური განვითარების უმნიშვნელოვანესი ინსტიტუციაა. სკოლაში იზრდება მრავალფეროვნება - ბავშვები, რომლებიც ადრე ვერ/არ დადიოდნენ ზოგადსაგანმანათლებლო დაწესებულებებში დღესდღეობით უფრო და უფრო ერთვებიან განათლების სისტემაში: ესენი არიან მაგალითად შეზღუდული შესაძლებლობისა და დასწავლის სირთულეების მქონე მოსწავლეები, ასევე ბავშვები მძიმე ეკონომიკური და სოციალური ფონის მქონე ოჯახებიდან.
უმნიშვნელოვანეს პრობლემას წარმოადგენს ასევე, ძალადობისა და ბულინგის თემა სკოლებში. ამ საკითხებთან დაკავშირებული კვლევები ცხადყოფს ბავშვებისა და მოზარდების ფსიქოემოციური მდგომარეობა და მათი სოციალური მხარდაჭერა გავლენას ახდენს მათ მიერ განათლების მიღების ხარისხზე.
ჩემი აზრით, ზემოთხსენებული პრობლემების პრევენციის, შემცირებისა და აღმოფხვრისთვის ფსიქოემოციური და სოციალური მხარდაჭერა სკოლებში უდიდეს მნიშვნელობას იძენს.