სამადაშვილი რუსეთის აგრესიულ ქმედებებზე საქართველოს სტრატეგიული პარტნიორის მკაცრ რეაგირებას მიესალმება
13.09.2017
ძალიან მნიშვნელოვანია ის, რომ ამერიკა რუსეთს მოუწოდებს, ცეცხლის შეწყვეტის ხელშეკრულება შეასრულოს, - ამის შესახებ ''ნაციონალური მოძრაობის'' ერთ-ერთმა ლიდერმა, სალომე სამადაშვილმა აშშ-ის სახელმწიფო დეპარტამენტის განცხადების კომენტირებისას განაცხადა.

სამადაშვილი რუსეთის აგრესიულ ქმედებებზე საქართველოს სტრატეგიული პარტნიორის მკაცრ რეაგირებას მიესალმება. 

''განსაკუთრებით მნიშვნელოვანია ის, რომ განცხადებაში საუბარია 2008 წლის ცეცხლის შეწყვეტის ხელშეკრულების შესრულებაზე, იმიტომ, რომ ეს ხელშეკრულება საერთაშორისო ასპარეზზე დავიწყებას მიეცა და დღევანდელი ხელისუფლება ამ ხელშეკრულების შესრულების გასააქტიურებლად არაფერს აკეთებს. ამ კონტექსტში ძალიან მნიშვნელოვანია ის, რომ ამერიკა რუსეთს მოუწოდებს, ეს ხელშეკრულება შეასრულოს. აუცილებელია, რომ ხელისუფლებამ რუსულ მხარესთან ყველანაირ ორმხრივ ფორმატში კონსულტაციებზე უარი განაცხადოს, სანამ რუსეთი ცეცხლის შეწყვეტის ხელშეკრულების შესრულებას დაუყოვნებლივ არ დაიწყებს'', - განაცხადა სალომე სამადაშვილმა. 

''ევროპული საქართველოს'' ერთ-ერთი ლიდერი ზურაბ ჭიაბერაშვილი კი მიიჩნევს, რომ საოკუპაციო ხაზის გასწვრივ და ოკუპირებულ ტერიტორიებზე რუსეთის ქმედება ადასტურებს, რომ ''ქართული ოცნების'' პოლიტიკა მცდარია. 

''ქართული ოცნების'' მცდარი პოლიტიკის გამო, რომ რუსეთს უნდა დაუთმოთ, დავუყვაოთ, წავუყრუოთ, პრობლემებზე ხმამაღლა არ ვილაპარაკოთ საქართველომ წლები დაკარგა. რუსეთი უფრო თავხედური და აგრესიული გახადა. სამწუხაროდ, ჩვენ ვხედავთ, რომ იმ პირობებში, როდესაც ''ქართული ოცნების'' მიერ საერთაშორისო არენაზე ამ საკითხებზე ხმამაღლა ლაპარაკი არ ხდება და რუსეთი პოლიტიკურ ფასს არ იხდის ის უფრო აგრესიულად იქცევა'', - განაცხადა ჭიაბერაშვილმა.

შეგახსენებთ, რომ სახელმწიფო დეპარტამენტის მიერ გავრცელებული განცხადების თანახმად, აშშ შეშფოთებულია ოკუპირებულ სამხრეთ ოსეთში და აფხაზეთში ე.წ. ბორდერიზაციისა და გამშვები პუნქტების დახურვის გამო და რუსეთს მოუწოდებს, საქართველოს რეგიონებიდან თავისი სამხედროები გაიყვანოს.


კომენტარები


სხვა სიახლეები
ოთხ, 20 სექტემბერი 2017
20:41