პანდემიის გამო, საქართველოს საგანმანათლებლო სისტემა არაერთი გამოწვევის წინაშე დგას. არც ისაა მარტივი, ასეთ ვითარებაში საკუთარ პროფესიას ბოლომდე უერთგულო, თუმცა, ჩვენი პედაგოგები დგანან განათლებული მომავალი თაობების აღზრდის სადარაჯოზე და პროფესიულ წინსვლაზე ორიენტირებულები, თავს არ ზოგავენ - მოსწავლეებს მისცენ ხარისხიანი განათლება. სწორედ ასეთი თავდადების მაგალითია ლაგოდეხის მუნიციპალიტეტის, კართუბნის საჯარო სკოლა, სადაც სწავლა აქტიურად და არსებული რეგულაციების დაცვით მიმდინარეობს.

მოსწავლეები ჩართულები არიან სასკოლო ცხოვრებაში, საგაკვეთილო პროცესში, სხვადასხვა აქტივობასაც დიდი წარმატებით ახორციელებენ და სკოლის ერთმუშტად შეკრული, პროფესიონალი გუნდის დამსახურებით, ძალიან უყვართ სწავლა.

კართუბნის საჯარო სკოლაში ჩატარდა სახალისო შემეცნებითი შეჯიბრი ჭადრაკში - „ჩვენ და სკოლა“, რომელშიც მონაწილეობდნენ მესამე კლასის მოსწავლეები. აქტივობა მიზნად ისახავდა მოსწავლეებში ჭადრაკის სიყვარულის დანერგვას და სპორტის ამ სახეობის პოპულარიზაციას. შეჯიბრის ყველა მონაწილეს გადაეცა სიგელები, ხოლო გამარჯვებულებს, სიგელებთან ერთად - სამახსოვრო საჩუქრები.