მთავარი | სიახლეები | სკოლები | სამასწავლებლო | უნივერსიტეტები | სკოლამდელები - skolamdelebi.ge | მსოფლიო | სხვა სიახლეები |
2020-2021 სასწავლო წელი მიიწურა; იყო ბევრი გამოწვევა - დისტანციური სწავლება, ჰიბრიდული მოდელი, წერტილოვანი შეზღუდვები, მაგრამ მთავარი ისაა, რომ სასწავლო პროცესი შედგა და სკოლებიც ეროვნული სასწავლო გეგმით გათვალისწინებულ შედეგებზე გავიდნენ.
პედაგოგებს კი, რომლებიც დგანან განათლებული მომავალი თაობების აღზრდის სადარაჯოზე და პროფესიულ წინსვლაზე არიან ორიენტირებულები, თავი არ დაუზოგავთ - მოსწავლეებისთვის მიეცათ ხარისხიანი განათლება.
ხარაგაულის მუნიციპალიტეტის, მოლითის საჯარო სკოლა, ისევე, როგორც ყოველთვის, წელსაც მოწოდების სიმაღლეზე აღმოჩნდა - სწავლა აქტიურად და არსებული რეგულაციების დაცვით წარიმართა, რა თქმა უნდა, მოსწავლეების ჩართულობით სასკოლო ცხოვრებაში, საგაკვეთილო პროცესსა თუ სხვადასხვა აქტივობაში.
ხარაგაულის სპორტისა და შიდა ტურიზმის ცენტრის ორგანიზებით, მოეწყო ახალგაზრდა მოყვარულ მხატვართა კონკურსი, სადაც მოლითის საჯარო სკოლის VI კლასის მოსწავლეები - საბა ცუცქირიძე და ლუკა ჯამაგიძე მონაწილეობდნენ. „ლუკა ჯამაგიძე დასახელდა ჟიურის სიმპათიად. საბას და ლუკას შემდგომ წინსვლასა და წარმატებას ვუსურვებთ თავის პედაგოგთან, ხათუნა კაკიაშვილთან ერთად!“ - აღნიშნულია მოლითის საჯარო სკოლის მიერ გავრცელებულ ინფორმაციაში.