ევროკავშირის საბჭომ ერთიანი ევროპული პროკურატურის შექმნას მხარი დაუჭირა
12.10.2017

ევროკავშირის საბჭომ ერთიანი ევროპული პროკურატურის შექმნას მხარი დაუჭირა. 

ახალი უწყების შექმნას ევროკავშირის 28 ქვენიდან 20 სახელმწიფოს იუსტიციის მინისტრებმა დაუჭირეს მხარი.

გერმანიის იუსტიციის მინისტრის ჰაიკო მასის განცხადებით, ეს გადაწყვეტილება დიდი ნაბიჯია ევროკავშირის გაძლიერებისკენ. 

თავის მხრივ, მართლმსაჯულების საკითხებში ევროკომისარმა ვერა იუროვამ აღნიშნა, რომ ეს არის ევროკავშირისა და გადასახადების გადამხდელებისთვის ისტორიული დღე. მისი უწყების ინფორმაციით, ევროპული პროკურატურის საქმიანობა წელიწადში ასობით მილიონი ევროს შემოსავალს მოიტანს, ხოლო მისი შენახვა ბრიუსელს ყოველწლიურად 21 მილიონი ევროს დაუჯდება.

ევროპარლამენტმა ევროპული პროკურატურის შექმნას გასულ კვირას დაუჭირა მხარი. 

ახალი უწყება ძირითადად ევროკავშირის საბიუჯეტო სახსრების არამართლზომიერი გამოყენებისა და დამატებითი ღირებულების გადასახადთან დაკავშირებული მაქინაციების საქმეებზე იმუშავებს. ამჟამად, აღნიშნული სამართალდარღვევების სისხლის სამართლის გამოძიება ნაციონალურ დონეზე ხდება.

ევროპული პროკურატურის შექმნაზე ევროკავშირის წევრებს შორის მოლაპარაკებები რამდენიმე წლის განმავლობაში მიმდინარეობდა. 

გეგმის თანახმად, უწყება 2020 წლიდან იმუშავებს და მისი ოფისი ლუქსემბურგში განთავსდება. პროკურატურა ევროკავშირის 20 წევრს გააერთიანებს, მათ შორის გერმანიასა და საფრანგეთს. თითოეული ქვეყანა უწყებაში ერთ პროკურორს მიავლენს. 

როგორც ევროკომისიის განცხადებაშია ნათქვამი, პროკურატურის მუშაობაში ევროკავშირის სხვა წევრებსაც შეუძლიათ ჩაერთონ.




კომენტარები


სხვა სიახლეები
ორშ, 23 ოქტომბერი 2017
20:56