ეროვნული მუზეუმის აუდიტორიაში საერთაშორისო კონფერენცია ''ქეთევან დედოფლის მემკვიდრეობა'' გაიმართება
07.12.2017
საქართველოს ეროვნული მუზეუმის აუდიტორიაში საერთაშორისო კონფერენცია „ქეთევან დედოფლის მემკვიდრეობა" გაიმართება.

საერთაშორისო კონფერენციაზე „ქეთევან დედოფლის მემკვიდრეობა" მოწვეულნი არიან სპეციალისტები ინდოეთის არქეოლოგიის სამსახურიდან, გოას მსოფლიოს საკრალური მუსიკის საერთაშორისო ფესტივალის „ქეთევანი" დამფუძნებლები და სამხატვრო ხელმძღვანელი. კონფერენციაში აგრეთვე მონაწილეობენ პორტუგალიელი სპეციალისტები, რომლებიც ჩართულები იყვნენ ლისაბონის დაგრასას ტაძარში დაცული წმინდა ქეთევან დედოფლის ფრესკის კონსერვაციის პროექტში. დაგრასას ტაძარში დაცულ ფრესკაზე ქეთევან დედოფლის წამების სრული სცენაა ასახული. ფრესკის რესტავრაცია მოხდა საქართველოს კულტურული მემკვიდრეობის დაცვის ეროვნული სააგენტოს მხარდაჭერით.

კონფერენციის გახსნის ღონისძიებაზე მისასალმებელი სიტყვით გამოვლენ: საქართველოს ეროვნული მუზეუმის გენერალური დირექტორი, საქართველოს კულტურისა და ძეგლთა დაცვის მინისტრი, საგარეო საქმეთა სამინისტროს წარმომადგენელი, ინდოეთის ელჩი საქართველოში, საქართველოს ელჩი ინდოეთში და საქართველოს საპატრიარქოს წარმომადგენელი.

საქართველოსა და ინდოეთის რესპუბლიკას შორის დიპლომატიური ურთიერთობების დამყარების 25 წლის იუბილესთან დაკავშირებით, ორმხრივი სამთავრობო შეთანხმების შედეგად, 2017 წლის სექტემბერში საქართველოს მართლმადიდებელი ეკლესიის მიერ წმინდანად შერაცხული ქეთევან დედოფლის წმინდა ნაწილები საქართველოში ჩამოაბრძანეს. ქეთევან დედოფლის წმინდა ნაწილები გოაში მდებარე მე-19 საუკუნის დასაწყისში განადგურებული წმინდა ავგუსტინეს სახელობის მონასტრის ნაშთებში ინდოელმა არქეოლოგებმა აღმოაჩინეს. კვლევის შედეგები 2013 წელს ჟურნალ ARCHEOLOGY-ში დაიბეჭდა. ქეთევან დედოფლის წმინდა ნაწილები ინდოეთის არქეოლოგიის სამსახურის კოლექციაშია დაცული.


კომენტარები


სხვა სიახლეები
ორშ, 18 დეკემბერი 2017
18:59