ჩხენკელი: ''თბილისის 51-ე და პირველი ექსპერიმენტული სკოლების დირექტორების პასუხისმგებლობის საკითხი ამ ეტაპზე არ დგას''
07.12.2017
თბილისის 51-ე და პირველი ექსპერიმენტული სკოლების დირექტორების პასუხისმგებლობის საკითხი, რომელთა სკოლების მოსწავლეებს შორის დაპირისპირებას ორი მოზარდის სიცოცხლე ემსხვერპლა, ამ ეტაპზე არ დგას, - ამის შესახებ განათლებისა და მეცნიერების მინისტრმა, მიხეილ ჩხენკელმა ჟურნალისტებს მთავრობის სხდომის დასრულების შემდეგ განუცხადა.

„ჩვენ ველოდებით გამოძიების დასრულებას. გამოძიება გამოავლენს ყველა ფაქტს ამ გარემოების გარშემო და გამოძიების დასრულების შემდეგ ვისაც მიუძღვის ბრალი ამ სიტუაციაში, მას ყველას მოეთხოვება პასუხი, მაგრამ ამ ეტაპზე კონკრეტულად დირექტორების პასუხისმგებლობის საკითხი არ დგას, რამეთუ გამოძიება ჯერ დასრულებული არ არის“, - განაცხადა ჩხენკელმა.

1-ელ დეკემბერს, ხორავას ქუჩაზე მოზარდებს შორის დაპირისპირების დროს დაიჭრა 51-ე სკოლის ორი მოსწავლე, ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, ხოლო მეორე დაჭრილი მოზარდი, დათო სალარიძე 2 დეკემბერს "რესპუბლიკურ საავადმყოფოში" გარდაიცვალა.

ხორავას ქუჩაზე, მოზარდების მკვლელობის საქმეზე, დანაშაულის შეუტყობინებლობის ბრალდებით პროკურატურამ პასუხისგებაში 5 პირი მისცა, რომელთა შორის ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემული პირებიდან სამართალდამცველებმა მხოლოდ სამი დააკავეს, ვინაიდან 5 პირიდან ორზე არასრულწლოვანთა მართლმსაჯულების კოდექსი ვრცელდება.


კომენტარები


სხვა სიახლეები
ორშ, 18 დეკემბერი 2017
19:00